Македонскиот шампион МЗТ Скопје продолжува со формирањето на тимот за новата сезона, а најново засилување е американскиот плејмејкер Ноа Фарахан, кој денеска и официјално стави потпис на договорот со аеродромци.
Фарахан зад себе има солидно европско искуство, откако минатата сезона настапуваше за неколку клубови. Сезоната ја започна во Студент од Босна и Херцеговина, а потоа ги бранеше боите на Игокеа и Борац Бања Лука, пред да ја заврши во словачки Комарно.
Својата колеџ-кариера ја градеше во редовите на Источна Каролина, а подоцна настапуваше и за Вест Вирџинија и Хемптон пајратс. Минатото лето доби можност да се претстави и во Летната НБА-лига, каде што одигра четири натпревари во дресот на Сан Антонио.
Американецот е второто странско засилување на клубот ова лето, по ангажманот на босанскиот центар Емир Крајиниќ. Во тимот остануваат и искусните Дамјан и Војдан Стојановски, Андреј Маслинко и Андреј Андоноски, додека во клубот се вратија Лука Стојановски и Никола Василевски.
Во претстојната сезона МЗТ Скопје ќе се натпреварува во домашното првенство и Купот, како и во АБА2 лигата и ФИБА Еврокупот.
Leave a Reply