Еден од најпознатите коментатори и новинари, Един Авдиќ, почина на 47-годишна возраст, а според наводите на медиумите од БиХ, бил пронајден во својот стан во Белград откако претрпел ненадејни срцеви проблеми, објави „Радио Сараево“.
Веста за неговата смрт предизвика голем број реакции меѓу колегите, спортистите и љубителите на кошарката кои со години ја следеа неговата работа.
Да потсетиме, Един Авдиќ важеше за еден од најдобрите познавачи на кошарката во регионот, а публиката особено го ценеше поради неговите стручни анализи, препознатливиот стил на коментирање и големата страст кон играта под обрачите.
Во текот на својата кариера работеше на повеќе телевизиски станици, а најголема популарност стекна коментирајќи натпревари од НБА лигата, Евролигата, АБА лигата и настапите на репрезентациите.
Меѓу навивачите ќе остане запаметен по бројните легендарни преноси. Посебно место зазема натпреварот меѓу БиХ и Литванија на Европското првенство во 2013 година, како и славното финале на АБА лигата меѓу Партизан и Цибона, кога Душан Кецман постигна тројка за победа во последните секунди од натпреварот.
Неговите емотивни реакции и автентични коментари станаа составен дел од најважните кошаркарски моменти во регионот.
По објавувањето на веста за неговата смрт, социјалните мрежи беа преплавени со пораки на сочувство и збогување.
Бројни спортисти, тренери, новинари и медиумски куќи му оддадоа почит на човекот кој со децении беше еден од најпрепознатливите гласови на регионалната кошарка.
Покрај работата на телевизија, Авдиќ беше познат и како колумнист, аналитичар и автор на спортски емисии и подкасти, преку кои стекна дополнителна почит од публиката.
Неговото заминување претставува голема загуба за спортското новинарство, а зад себе остави богата кариера и наследство кое долго ќе го паметат љубителите на кошарката ширум регионот.
Leave a Reply