Еурофарм Пелистер ќе биде единствениот македонски претставник во групната фаза од Европската лига на ЕХФ во сезоната 2026/27. Битолскиот состав ќе ја очекува ждрепката, закажана за 17 јули, од првиот шешир, со што ќе има статус на носител и ќе избегне неколку од најсилните ривали во оваа фаза од натпреварувањето.
Македонскиот шампион нема да може да се сретне со Фленсбург, Нексе, Татабања, Савехоф, Извиѓач, Бенфика и Бидасоа Ирун, кои исто така се дел од првиот шешир.
Во меѓувреме, ГРК Охрид остана без посакуваната „вајлд-карта“ за настап во второто по квалитет европско клупско натпреварување. Иако охридскиот клуб поднесе барање и се надеваше на позитивен исход, Европската ракометна федерација не му додели место во Европската лига.
Во групната фаза ќе учествуваат 32 екипи, распределени во осум групи со по четири клуба. Пласман во елиминациската рунда ќе обезбедат првопласираните и второпласираните тимови од секоја група, додека првите натпревари се закажани за 29 и 30 септември.
При извлекувањето ќе важи и вообичаеното правило на ЕХФ, според кое две екипи од иста држава не можат да бидат сместени во иста група.
Прв шешир: Фленсбург, Нексе, Татабања, Савехоф, Извиѓач, Еурофарм Пелистер, Бенфика, Бидасоа Ирун.
Втор шешир: Валур, Шафхаузен, Елверум, Лимож, Карвина, Гранољерс, Татран Прешов, Гумерсбах.
Трет шешир: Сесвете, Хафнарфјордур, Бузау, Сен Рафаел, Слован, Шамбери, Торелавега, Ла Риоха.
Четврти шешир: ЦСМ Букурешт, Маритимо, Агуаш Сантас, Морс, Бергишер, Холстебро, Гдањск, Хамарби.
Leave a Reply