Ова се можните противници на Вардар во квалификациите за ЛШ

Со завршувањето на сезоната во поголемиот дел од европските шампионати, познати се и сите потенцијални противници на Вардар во првото квалификациско коло од Лига на шампиони.

Меѓу потенцијалните противници на Вардар се Шамрок Роверс, КУПС, Дрита, Линколн Ред Импс, Борац Бања Лука, Викингур, Каират Алмати, Крајова, Рига, КИ Клаксвик, Флора Талин, Ларне, Петрокуб и ТНС.

Вардар последен пат настапуваше во квалификациите за Лигата на шампионите во 2017 година, кога по елиминацијата од Копенхаген во третото квалификациско коло, продолжи во плеј-офот од Лига Европа. Тогаш скопскиот тим двапати го совлада Фенербахче и обезбеди историски пласман во групната фаза.

Минатата сезона „црвено-црните“ настапија во квалификациите за Конференциска лига, каде што нивниот европски пат заврши во второто коло по дуелите со Лозана.

Првите натпревари од квалификациите се закажани за 7 јули, додека реваншите ќе се играат на 14 и 15 јули. Ждрепката за првото квалификациско коло е предвидена за 16 јуни.