По одигрувањето на 27. коло во Втората македонска фудбалска лига, Македонија Ѓорче Петров и Арсими се покажаа како најголемите добитници во борбата за врвот на табелата.
Лидерот Македонија ЃП немаше проблеми на домашен терен и очекувано ги освои трите бода против последнопласираниот Борец. „Лавовите“ со сигурна игра и конечни 3-0 уште еднаш ја оправдаа фаворитската улога и ја зацврстија лидерската позиција, сега со уште поголема предност на табелата.
Најмногу од ова коло профитираше тимот на Арсими, кој во дербито на колото беше подобар од Брегалница со 2-1. Со оваа значајна победа, тимот од Чегране се искачи на втората позиција со 57 бодови, три помалку од водечките „лавови“ од Ѓорче Петров.
На Арсими му одеше во прилог и ремито меѓу Башкими и Куманово (1-1), резултат што дополнително ги оддалечи нивните ривали во трката за промоција.
Финишот од сезоната ветува голема драма, особено во борбата за местата што носат директен пласман во Првата лига.
Leave a Reply